Na Hostoveh bregeh
al Veleh stenah,
pogledajte samo
stat će vam sad dah.
Za se ovo lepo
ča se tu storilo,
ma da van poveden
ča je prvo bilo.
Teplilo ih sunce,
daš ih umival.
Samo škrebut trava
tu je obstal.
Vele stene to su
tako se zovu,
ni sanjale nisu
lepotu ovu.
A kako je bilo
tu zblagon na paše
spametit je lahko
te starije naše.
Tu kade su deca
na ploče igrala
spomen je još samo
na to sad ostala. |
Na ten mestu sada
zirasal je mladić
saki mu je dal
jubavi kuščić.
Rabilo je čuda
truda pota muke,
ma se su storile,
složne, marne ruke,
ruke ke toliko
puno, puno vrede.
Zirasal je Dom
Češke nan besede.
Jubav za svoje
toliko je vela,
da se ne boje
nikakoveg dela.
I za sa veselja
glavna in užanca,
tu van se kanta
i najlepše tanca. |
Tanci to su češki
ma, iz naših kraji
si će tu zatancat,
nezna se ča raji.
Z Učke gore vetrić
obraz mu hladi,
veseli su nutre
i stari i mladi.
Ča da van rečen
za jubav van tu
čerljeno plavi galeb
Dom sada zovu.
Od Kvarnera
z mora
pozdravi mu slede
na Pehlinu, tu je
Dom češke besede. |
